கடுமையான சூழல்நிலைகளில் மேம்படுத்தப்பட்ட வளர்ச்சி எதிர்பார்ப்புகளில் கவனம் செலுத்துகின்றது

யூனியன் வங்கி தனது தலைமைத்துவ அணியில் புதிதாக இரு அங்கத்தவர்களை இணைத்துள்ளதாக அறிவித்துள்ளது.

வங்கியின் பிரதம தகவல் அதிகாரியாக நிசல கொடிப்பிலி நியமிக்கப்பட்டுள்ளதுடன், சிறிய, நடுத்தரளவு தொழில்முயற்சியாளர் வங்கியியல் மற்றும் கொடுக்கல் வாங்கல் வங்கியில் பிரிவுகளின் உப தலைவராக வங்கியியல் துறையில் அனுபவம் வாய்ந்தவரான அசங்க ரன்ஹொட்டி நியமிக்கப்பட்டுள்ளார்.

நேஷன்ஸ் ட்ரஸ்ட் வங்கியின் பிரதம தகவல் அதிகாரியாக கொடிப்பிலி முன்னர் பதவி வகித்திருந்தார். 20 வருடங்களுக்கு மேலான துறைசார் அனுபவத்தைக் கொண்டுள்ள இவர், வங்கிகளில் தகவல் தொழில்நுட்பம் மற்றும் டிஜிட்டல் புத்தாக்கங்களை முன்னெடுத்துச் செல்வதில் அதிகளவு பங்களிப்பை வழங்கியுள்ளார். இவர் மேற்கு அவுஸ்திரேலியாவின், எடித் கோவான் பல்கலை;கழகத்தில் வணிக நிர்வாக மாஸ்டர்ஸ் பட்டத்தை பெற்றுள்ளதுடன், பிரித்தானிய கணினி சமூகம் (MBCS) மற்றும் அவுஸ்திரேலிய கணினி சமூகம் ஆகியவற்றின் நிபுணத்துவ அங்கத்தவருமாவார். இலங்கை வங்கியியலாளர்களின் CIO அமர்வின் தலைவராக கொடிப்பில் செயலாற்றுவதுடன், FINCSIRT செயற்குழுவின் அங்கத்தவருமாவார். யூனியன் வங்கியின் வளர்ந்து வரும் டிஜிட்டல் வங்கியியல் மூலோபாயத்துக்கு நிசல கொடிப்பிலி தலைமைத்துவம் வழங்குவதுடன், வியாபார வளர்ச்சிக்கு, வங்கியின் தகவல் தொழில்நுட்ப செயற்பாட்டை பிரதான பங்களிப்பு வழங்கும் பிரிவாக வலிமைப்படுத்தும் நடவடிக்கைகளையும் முன்னெடுப்பார்.

யூனியன் வங்கியுடன் இணைந்து கொள்ளும் முன்னர் ரன்ஹொட்டி, டொயிஷ் வங்கியின் பண முகாமைத்துவம் மற்றும் வியாபார நிதியியல் பிரிவின் உப தலைவராக செயலாற்றியுள்ளார். வங்கியியல் துறையில் 24 வருட கால அனுபவத்தை இவர் கொண்டுள்ளதுடன், சிறிய, நடுத்தரளவு தொழில்முயற்சியாளர்கள், வாடிக்கையாளர் வங்கியியல், கூட்டாண்மை வங்கியியல், கொடுக்கல் வாங்கல் வங்கியியல், வர்த்தக நிதியியல் மற்றும் கடன் இடர் ஆகிய பிரிவுகளில் உள்நாட்டு மற்றும் சர்வதேச வங்கிகளில் இவர் பணியாற்றிய அனுபவத்தைக் கொண்டுள்ளார். வங்கியியலாளர் பட்டய கல்வியகத்தின் (FCIB) அங்கத்தவராக ரன்ஹொட்டி திகழ்வதுடன், கொழும்பு பல்கலைக்கழகத்திலிருந்து MBA பட்டத்தையும் பெற்றுள்ளார். ஐக்கிய இராஜ்ஜியத்தின் மான்செஸ்ட்டர் பல்கலைக்கழகத்தின் விஞ்ஞானமும் தொழில்நுட்பமும் கல்வியகத்தில் நிதிச் சேவைகளில் விஞ்ஞான இளமானிப் பட்டத்தையும் பெற்றுள்ளார். இலங்கையின் நிபுணத்துவ வங்கியியலாளர் சம்மேளனத்தின் கடந்து செல்லும் தலைவராகவும் இவர் திகழ்கின்றார். யூனியன் வங்கியின் பண முகாமைத்துவம் மற்றும் கொடுக்கல் வாங்கல் வங்கியியல் செயற்பாடுகளை அசங்க ரன்ஹொட்டி நிர்வகிப்பதுடன், வங்கியின் சிறிய, நடுத்தரளவு தொழில்முயற்சியாளர் வங்கியியல் வியாபார செயற்பாடுகளை புதுப்பிக்கப்பட்ட மூலோபாயத்திட்டங்களுடன் முன்னெடுக்கவுள்ளார்.

வங்கி சிறந்த பெறுபேறுகளை பதிவு செய்திருந்த முக்கியமான தருணத்தில் இந்த இரு புதிய நியமனங்களும் வழங்கப்பட்டுள்ளன. துரித வளர்ச்சிக்கான மூன்றாண்டு கால மூலோபாய திட்டத்தின் இரண்டாவது ஆண்டில் வங்கி பயணித்த வண்ணமுள்ளது. வங்கியின் தொடர்ச்சியான வளர்ச்சியில் வருமானம் மற்றும் இலாபகரத்தன்மை ஆகியவற்றின் அதிகரிப்பு பங்களிப்பு வழங்கியிருந்தன. யூனியன் வங்கியின் தொடர்ச்சியான வளர்ச்சியை அண்மையில் ஃபிட்ச் ரேட்டிங் ஸ்ரீ லங்கா மேலும் உறுதி செய்து, நீண்ட கால தேசிய தரப்படுத்தலை மேம்படுத்தியிருந்தது.

புதிய நியமனங்களுடன், யூனியன் வங்கியின் தலைமைத்துவ அணியில், இந்திரஜித் விக்ரமசிங்க – நிறைவேற்று பணிப்பாளர்/பிரதம நிறைவேற்று அதிகாரி, ஹிரந்தி டி சில்வா – உப தலைவர் மொத்த வங்கியியல், விஜே தம்பவின்ன – உப தலைவர், திறைசேரி தலைமை அதிகாரி, எஸ். ஸ்ரீ கணேந்திரன் – உப தலைவர், செயற்பாடுகள், ரவி ஜயசேகர – உப தலைவர், மனித வளங்கள், சாயா ஜயவர்தன – உப தலைவர், வாடிக்கையாளர் வங்கியியல், இனோகா ஜயவர்தன – உதவி உப தலைவர் /சட்ட தலைமை அதிகாரி/கம்பனி செயலாளர், நிசல கொடிப்பிலி – பிரதம தகவல் அதிகாரி, அசங்க ரன்ஹொட்டி – உப தலைவர் சிறிய, நடுத்தரளவு வங்கியியல் மற்றும் கொடுக்கல் வாங்கல் வங்கியியல், மலிந்த சமரதுங்க – பிரதம நிதி அதிகாரி மற்றும் சுஹேன் வணிகசூரிய – பிரதம இடர் அதிகாரி ஆகியோர் அடங்கியுள்ளனர்.

இலங்கையின் அதிகளவு மூலதனவாக்கத்தைக் கொண்ட தனியார் வணிக வங்கியாக யூனியன் வங்கி தொடர்ந்தும் முன்னேற்றத்தைப் பதிவு செய்ய தன்னை நிலைப்படுத்தியுள்ளது. இதற்கு ஐக்கிய அமெரிக்காவை தளமாகக் கொண்டியங்கும் சர்வதேச முதலீட்டு நிறுவனமான TPG இன் 70 பில்லியன் அமெரிக்க டொலர்களுக்கும் அதிகமான தொகை மூலதனமாக வழங்கப்பட்டுள்ளமை பெரிதும் பக்கபலமாக அமைந்திருக்கும். TPG இன் முதலீட்டைத் தொடர்ந்து, வளர்ச்சியை நோக்கிய புதிய பயணத்தை யூனியன் வங்கி ஆரம்பித்துள்ளதுடன், சகல வசதிகளையும் கொண்ட வணிக வங்கியாக கூட்டாண்மை, சிறிய நடுத்தரளவு வணிகங்கள் மற்றும் சில்லறை வங்கியல் பிரிவுகளுக்கு சேவைகளை பெற்றுக் கொடுக்க முன்வந்துள்ளது. உறுதியான அடித்தளத்துடனான நிதியியல் உறுதிப்பாட்டுடனும் புதுப்பிக்கப்பட்ட வியாபார நோக்குடன் சர்வதேச அனுபவத்தைக் கொண்டு இயங்கும் யூனியன் வங்கி தற்போது இலங்கையில் வேகமாக வளர்ந்து வரும் வணிக வங்கிகளில் ஒன்றாக திகழ்கின்றது.